Langá á Mýrum - dagar 22 og 23

Jibbí, alltaf gaman að veiða Langá á Mýrum. Veiddi kvöld- og morgunvakt og teljast það 22. og 23. veiðidagar sumarsins. Ég var svo heppinn að koma að ánni eftir rigningar og áin að jafna sig, þó hún hafi verið ansi hröð.

Kvöldvaktin var tíðindalaus þó lax hafi sést hér og þar en morgunvaktin var mjög góð. 3 tökur, 2 láku af á fjallinu fyrir neðan vaðið við #80 Hólmatagl og svo á #73 Hellisbreiðu, en 1 náðist í #60 Hólsbreiðu. Ég var að prufukeyra nýja stöng, Guideline Exceed #6. Hún reyndist frábærlega og ekki skemmdi Einarsson hjólið og ég nota með henni.

Sá tók svarta Frances micrótúpu neðst á veiðistaðnum beint fyrir framan þennan stein sem sést á myndinni. Þeir sem láku af tóku Collie Dog #14 og Collie Dog túpu (Gunnsó) 1/2 tommu.

Eins og fram kom hér fyrir ofan var áin dálítið hröð og örlítið lituð þannig að legustaðirnir voru á öðrum stöðum en maður á að venjast. Í flestum tilfellum frekar neðarlega á veiðistöðunum og það þarf klárlega að taka það með í reikninginn að veiða sig vel niður staðina við slíkar aðstæður. En þetta voru frábærar vaktir við yndislega á í góðum félagsskap. Svæðið er í sölu hjá SVFR og má finna veiðileyfi hér: http://svfr.is/veidileyfi/ og lýsingu á svæðinu hér: http://svfr.is/?PageId=0938759e-06b3-458f-b695-e7635a393fc3

 

Veiðifélagi minn í þessari ferð var Gunnar Már Hauksson veiðimaður og þekkir hann ána vel. Ég tók stutt viðtal við Gunnar Má eftir morgunvaktina þar sem við vorum staddir í Hólaskjóli á Litla Fjalli og ég set það inn fljótlega.

Það má benda á að til er veiðileiðsögn um svæðið og hana má finna hér: http://langa.is/pdf/langa.pdf

Setti inn myndband að sjálfsögðu og hér er það:

 

Ekki gleyma að læka á Fésinu:

Flóðatangi - Dagar 15 og 16

Flóðatangi er veiðisvæðið neðst í Norðurá við vatnamót Norðurár og Hvítar. Það spannar um 11 veiðistaði og helsta veiði þar er bleikja og urriði (sjóbirtingur). Einnig læðist stöku lax með enda fer allur norðurárlaxinn þarna um.

Húsið er gamalt en ágætt, þar er gott grill og fín verönd með frábæru útsýni og meira að segja gervihnattamóttakari og hvaðeina. Svæðið er í sölu hjá SVFR og má finna veiðileyfi hér: http://svfr.is/veidileyfi/ og lýsingu á svæðinu hér: http://svfr.is/veidisvaedi/silungsveidi/flodatangnordura/

 

Það gekk ekki vel hjá mér í Flóðatanga. Ég var alls ekki að ná þessu svæði, einnig var enginn fiskur skráður í veiðibókina þannig að það hjálpaði ekki til. Mér segir svo hugur að þetta svæði sé í einhverri lægð sem er miður, því þarna er allt til alls og aðstæður hinar bestu. Þá má líka vel vera að þekkingarleysi mitt á staðháttum valdi enda prófaði ég ekki marga veiðistaði. Veðrið var hið besta fyrir sóldýrkendur en í verra lagi fyrir veiðina.

Ég prófaði straumflugur og púpur en allt komið fyrir ekki, gengur vonandi betur næst.

 Hér er svo vídeó að sjálfsögðu.

Haukadalsá - dagar 13 og 14

Haukadalsá er skammt sunnan við Búðardal og liggur veiðisvæðið frá Haukadalsvatni og upp á heiði, eða um 11 km. Þetta er skemmtilegt svæði, aðalega bleikja en einnig má finna lax á svæðinu. Ég tók seinni vakt og fyrri vakt sl. fimmtudag og föstudag. Ekki var þó byrjunin góð því ég var ekki fyrr mættur í veiðikofann að startarinn í bílnum gaf sig. Það var of seint að fara gera eitthvað í málunum þann daginn þannig að ég fór um ána nálægt veiðikofanum.

  Veiðikofinn er fínn, þar er heitur pottur, gasgrill og allt til alls og alveg til fyrirmyndar. Svæðið er í sölu hjá SVFR og má finna það í netsölunni hjá þeim hér: http://svfr.is/veidileyfi/ og lýsingu á svæðinu hérna: http://svfr.is/veidisvaedi/silungsveidi/haukadalsahaukadalsa/ 

Það var ekki mikið að frétta af miðsvæðinu í ánni og sá ég hreinlega ekki fisk fyrr en á morgunvaktinni þegar bílinn var kominn í lag. Og þá var það lax og slatti af honum. Hann var í gljúfrunum ofarlega á svæðinu á veiðistað sem ég held að heiti hlaupagljúfur eða eitthvað svipað. það nafn er vel við hæfi því líklega er vonlaust að veiða á annað en maðk þar, og ef hann tekur þarf að öllum líkindum að landa honum á eyrunum fyrir neðan gljúfrin. En svæðið er flott þó ég hafi farið fisklaus frá því í þetta skiptið og bara náttúran þarna í dalnum gerir veiðiferð þangað vel þess virði. það má einnig benda á að þetta er mjög fjölskylduvænt svæði og áreiðanlega mjög gaman að veiða í vatninu sjálfu.  Að sjálfsögðu fylgir vídeó með :)

 

Arnarvatnsheiði norðan megin - dagar 8 til 12

Jæja jæja, uppáhaldsstaðurinn minn, Arnarvatnsheiðin og Austuráin voru dagar 8 til 12 að þessu sinni. Að venju hittumst við félagarnir úr árgangi ´73 frá Patró þarna hressir og kátir, nema helvítið hann Rúnar sem var fjarri góðu gamni að þessu sinni að gera við kafbát undan strönd Venezuela.

Arnarvatnsheiðin er í einhverri lægð, það er alveg ljóst. Bæði bleikjan og urriðinn eru sjálfsagt í einhverju sögulegu lágmarki eða skringilegu hegðunarmynstri. Gegnumsneytt var mikið af smáfiski en ótrúlega lítið af meðal- og stærri fiski. Hvað veldur hef ég ekki hugmynd um. Við veiddum engan fisk í vatninu, einn í Skammá og einhvern slatta af smáfiski í Austuránni.

Í þetta skiptið gekk ég sjálfsagt um helminginn af ánni og þá alveg frá brúnni og upp að henni miðri. Einnig veiddi ég nokkra hyli ofantil og þar fékk ég einmitt þennan glæsilega 63 sm hæng sem tók Parachute þurrflugu #14.

Baráttan við hann var mjög skemmtileg og tók hann nokkrar rokur lengst niður eftir en stökk aldrei enda þungur og mikill fiskur. Ég fékk sjálfsagt hátt í hundrað minni urriða í Austuránni að þessu sinni en þeir voru nánast allir undir pundinu og fengu því líf. Allir nema einn tóku þurrflugu af einhverri gerð.

Ég er frekar svekktur með vötnin, bæði Arnarvatn stóra og Grandalón gáfu engan fisk og það er í fyrsta skipti sem það gerist hjá okkur strákunum en þetta eru mikil viðbrigði frá því við vorum að fara með heilu frauðkassana niður fulla af flökum. En vonandi jafnar þetta sig nú því náttúran hlýtur að laga sig að breyttum aðstæðum, hvað það nú er sem veldur, hvort það er hlýnun eða breytt veðurfar, dýralíf eða gróður. Ég hef þó dálitlar áhyggjur af því að minnkurinn sé valdur að þessum breytingum að einhverju leyti. Hann á greiðan aðgang að hrygningarstöðvum þessara fiska og það gæti valdið töluverðum breytingum á nokkrum árum, án þess að ég viti það fyrir víst. En einn af þessum gaurum kom upp úr steinahrúgi rétt hjá okkur í Sesseljuvík, sem er fornfrægur veiðistaður en gaf ekki pöddu í þetta skiptið.

Þó veiðin hafi verið með lakasta móti sem ég hef upplifað þarna þá eru þessar ferðir samt ógleymanlegar og alveg þrælskemmtilegar. Veiðivörðurinn hann Eiríkur á auðvitað þátt í því enda eru móttökurnar vinalegar og hlýjar þegar við félagarnir mætum, og takk kærlega fyrir okkur.

Ósá og Syðridalsvatn - dagar 6 og 7

Tók einn dag í Ósánni sem liggur frá Syðridalsvatni og niður í sjó á Bolungarvík. Fór einnig í hana í fyrra en þó seinna og náði nokkrum ágætum sjóbleikjum en í þetta skiptið var ég helst til snemma á ferðinni. Það kom ein bleikja á og var hún heldur lítil. Sjá færslu frá í fyrra hér: http://gustig.blog.is/blog/gustig/entry/1184596/

Fór einnig tvisvar í Syðridalsvatn en stoppaði heldur stutt vil í hvort skipti og set það því saman sem einn dag. Í stuttu máli þá var ekkert í gangi þar heldur og ætla ég því að bíða aðeins með nánari veiðilýsingu þar til eitthvað veiðist. Það vatn er heldur að stríða mér því ég hef reynt nokkrum sinnum við það með ansi slökum árangri. Meira að segja ísdorgið var ekki að gera sig.

En batnandi mönnum er best að lifa og ég reyni betur þegar líða tekur á og sjóbleikjan farin að ganga af meiri krafti.

 

Múlatorfa - Laxá í Aðaldal - dagar 4 og 5

Þetta svæði er gersemi, alger gullnáma fyrir þá sem hafa gaman af þurrfluguveiði og urriða. Svæðið er stórt, of stórt til að komast yfir á 1-2 dögum. Þetta svæði er eitt af þeim svæðum sem ég mun leita reglulega til á komandi árum, það er engin spurning. Það hefur allt að bera sem eitt besta urriðasvæði heims þarf að hafa. Svæðið er í sölu hjá Stangó: http://svfr.is/veidisvaedi/silungsveidi/laxaiadalaxaimul/ og myndi ég ráðleggja nýliðum á svæðinu að tala við reynda heimamenn eins og Bjarna Höskulds, það hjálpaði okkur félögunum mikið.

Þarna fékk Sage fjarkinn minn loksins að njóta sín almennilega við réttar aðstæður, nú er bara að að byrja að skipuleggja næstu heimsókn norður  

 

Setti saman stutt vídeó frá degi 4 og 5 í Múlatorfunni. Náði nokkrum skemmtilegum tökum á Contour vélina sem sannaði sig glæsilega í þessari ferð, þvílík snilldar græja, að geta haft hana á derhúfunni er algerlega málið. 

 

Fallegur Urriði úr Múlatorfunni, tekinn á norðurendanum á Hrísey. 

 

Staðartorfa - Laxá í Aðaldal - dagur 3

Staðartorfa er fyrir neðan virkjun, beint á móti Presthvammi sem ég veiddi á degi 2 og er í raun hluti af sama veiðisvæði, það er straumskilunum við miðju svæðisins. Staðartorfan er klárlega þurrflugusvæði eins og Presthvammur og er auðveldlega vætt allstaðar. Það eru nokkrar holur sem við fundum sem geyma fisk og lenti ég í dálítlu ævintýri á kvöldvaktinni þegar 5 vænir urriðar tóku í röð, allt úr sömu holunni milli hólmans og grynninganna neðarlega í Presthvammi, sjá betur á yfirlitsmyndinni.

 

Styrkleiki svæðisins er kláralega eins og fram kemur hér fyrir ofan, þurrfluga. það er nóg af fiski á svæðinu og þegar þeir byrjuðu að taka var töluvert um að vera, ég sá þó engar yfirborðstökur þennan dag enda veðrið fráleitt gott. Allir fiskarnir tóku PT þyngdar púpur frá honum Ingó í Vesturröst, en sjá má hvaða flugur voru valdar í ferðina í myndbandinu frá Presthvammi.

Skemmtilegt svæði en ekki ýkja stórt, verður gaman að heimsækja það aftur seinna sumar. 

 

Presthvammur - Laxá í Aðaldal - dagur 2

Presthvammur er svæðið norðaustan megin fyrir neðan virkjun í Aðaldalnum. Eins og glöggir lesendur vita veiddi ég Laxárdalinn í fyrrasumar og er það svæði semsagt fyrir ofan virkjun. Helsta veiðin á svæðinu er urriði af stærðinni 1-1,5 pund. Stærsti fiskurinn mældist 48 sm. Ég er þess þó fullviss að þarna eru töluvert stærri fiskar. 

Frábært svæði, engin spurning! Vorum heldur óheppnir með veður, morguninn byrjaði með hagléli og síðan rigningu og stífri ASA-átt. Veðrið hélst svipað allan daginn og lofthiti um 4 gráður. það var því ekki mikið um þurrfluguhlugmyndir þennan daginn, en það held ég sé einmitt styrkleiki þessa svæðis. Presthvammurinn og svæðið á móti, Staðartorfa eru alveg frábær þurrflugusvæði og hlakka ég til að prófa það þegar veðrið er örlíti skárra.

Hér er vídeófærslan og fyrir neðan smá yfirlitsmynd sem sýnir hvernig mér fannst best að nálgast svæðið, en þó má benda á að sökum veður var þetta heldur í styttri kantinum.

Svæðið er í sölu hjá Svfr og má sjá nánar um það hér:http://svfr.is/veidisvaedi/silungsveidi/laxaiadalaxaprest/ 

 

 

Sauðlauksdalsvatn í Patreksfirði - dagur 1

 Sauðlauksdalsvatn er í Sauðlauksdal í Patreksfirði. Vatnið og umhverfi þess er mjög fallegt, hvítur sandur er einkennandi fyrir dalinn, vatnið og ánna sem úr því rennur til sjávar. Vatnið er einnig eitt af betri veiðivötnum landsins og má finna þar urriða og bleikju í miklu magni sem og sjóbirting og og sjóbleikju. Einnig er áll í vatninu og flundran hefur gert sig heimakomna á vatnasvæðinu undanfarin 7 ár. Þó er verið að bregðast við því nú á þessu ári með stíflugerð að sögn kunnugra.

Eins og sést er hvíti sandurinn allsráðandi á þessu svæði og minnir það um margt á sólarströnd við Miðjarðarhaf á góðum júlídegi.

Vatnið var ansi kalt fyrsta veiðidag sumarsins, eða um 1,4 gráður en bæði urriði og bleikja var á ferðinni og gerðu nokkrir þarna góða veiði á seinniparti dagsins.

Allt agn er að ég held leyfilegt en vatnið býður upp á mjög skemmtilega fluguveiði, bæði þurrflugu og púpur. Eins getur verið gott að reyna við svarta og rauða nobblera í sjóbirtinginn á töngunum. það hefur reynst mér vel.

 Hér má sjá kort af vatninu með merkingum á uppáhalds veiðistöðunum mínum.

 

 

Sauðlauksdalsvatn í í Veiðikortinu , og svo er hér auðvitað myndbandið. http://www.veidikortid.is/Pages/181

Veiðisumarið er byrjað - markmiðið skýrt!

Jæja jæja,

nú er sumarið byrjað og um að gera að setja sér markmið að venju. 

• 50 dagar í veiði
  • veiða í öllum landshlutum
  • veiða allar tegundur ferskvatnsfiska 

Svona er það nú og um að gera að byrja fjörið.

Í tilefni af því að veiðisumarið er byrjað og þetta er auðvitað rafræn veiðidagbók með vídeóbloggi, þá er hérna stutt kveðja sem ég tók upp í Aðaldalnum í gær.

Svo vil ég að sjálfsögðu hvetja alla til að nota gleraugu og der/húfu við fluguveiði, það er aldrei of varlega farið og leiðinlegt að skemma góðan dag með óþarfa meiðslum. Hafið einnig í huga að ef þið eruð með fjölskylduna með ykkur að passa að krakkarnir séu einnig varin.

Gleðilegt veiðisumar og "strekktar línur" :)