Muninn að verða þokkalegur, það verður gaman í sumar!

Muninn er loksins orðinn nokkuð góður og flughæfnin ásættanleg. Það myndaðist töluverður titringur sem kom til af örlitlum villum í flugkortinu varðandi hreyfla 6 og 7 og síðan einangraði ég myndavélahölduna með foam. Það á eftir að balansera hreyflana og skipta um mótor 4 sem skemmdist örlítið við prufanir fyrir nokkru.

Nýjasta myndbandið sýnir ágætlega hversu lipur Muninn er og næstur tveir mánuðir munu fara í flugæfingar og fínstillingu á KK2.0 flugkortinu. 

FPV flug í dag og allt gekk að óskum

Náði hreinu FPV, eða "first person view" flugi í dag. Það gekk mjög vel en var líka mjög skrítið. Að er dálítið fyndið að horfa á sjálfan sig í gegnum "augu" Munans. Það er erfitt að treysta vídeógleraugunum, maður ósjálfrátt reynir að horfa og hlusta "framhjá" en þetta kemur allt. Málið er að treysta því sem maður sér og þá gengur þetta fínt. FPV flugið var mjög líkt því að fljúga í flughermi. Ég bíð spenntur eftir góðu veðri til að geta tekið almennilegar myndir á græjunni.

X930 Octocopterinn Muninn í tilraunaflugi #5

Hefur gengið nokkuð vel í undanförnum tilraunaflugum. Smávægileg stillingaratriði eftir og svo þarf ég að balansera hreyflana til að ná sem mestum vibringi burt.

 

En allt í allt nokkuð ánægður með græjuna. Næstu flug fara í að æfa FPV flughæfnina og þá fer maður vonandi að ná skemmtilegum loftmyndum. Æfingasvæðið verður í kringum Syðridalsvatn og árnar þar fyrir ofan um leið og veður leyfir. Hér er smá myndband:

X930 Octocopter - Fyrsta flugið - "Muninn"

Undanfarnir mánuðir hafa farið í að byggja fjölhreyfla myndavélapalla fyrir myndbönd sumarsins, fyrst var það Quadcopter(4 hreyfla) sem fékk nafnið Huginn og svo Octocopter (8 hreyfla) sem auðvitað fékk nafnið Muninn.

Huginn fór í sína fyrstu flugferð fyrir 4 dögum síðan en það náðist ekki á myndband, því miður og við misstum 2 hreyfla þannig að nú er beðið eftir varahlutum frá Kína. En í millitíðinni lauk smíði Munins og er þetta fyrsta flugið hans.

Markmiðið með smíði þessara fjölhreyfla myndavélapalla er að ná góðum yfirlitsmyndum af veiðisvæðunum sem og að ná sjónarhornum sem annars væri nánast ómögulegt. seinni part vetrar fer því í flugæfingar og að stilla græjunar af til að gera þær sem stöðugastar og halda titringi í lágmarki. 

Við smíði Munins notaðist ég við álarma og carbon í búkinn. Það eru 8*30amp ESC og 8*3635 NMT Prop Drive Series mótorar sem hver um sig hefur 1,5kg lyftigetu. Að auki til að hjálpa til vil stjórnun er í græjunni HK KK2.0 Flight Contol Board og er það stillt á Octocopter-X. 

Í tilraunafluginu var ég með 1*LiPo 3S 3300MaH batterí sem skiluðu um 7 mínútum en ég geri ráð fyrir að nota 2*4S 5000MaH í framtíðinni auk þess að vera með 1*LiPo 2S 1000Mah batterí fyrir myndavél og FatShark 250Mhz vídeósendi. 

En hérna er myndbandið :)

Móralskur stuðningur!

 

Því er ekki að neita að veiðifélagar skipta máli og því má benda á nokkur atriði sem maður ætti ekki að segja við félagann:

• Ég myndi ekki reyna þessa flugu, en endilega prófaðu!
• Rosalega er afslappandi að vera hérna, en ertu ekki stressaður út af fundinum á morgun?
• (fiskur nýbúinn að taka) Vá þetta er stærsti fiskur sem ég hef séð!
• (félaginn nýbúinn að missa fisk) Vá þetta var stærsti fiskur sem ég hef séð!
• Hnúturinn hjá þér er eitthvað skrýtinn, en ekki hafa áhyggjur af því!
• Langar þig í helminginn af þessum banana?

Já við höfum sjálfsagt séð og heyrt ýmislegt í veiðinni, endilega setjið athugasemdir með fyndnum atriðum frá ykkur :)

Þýtt og staðfært af Deneki.com.

Veiðiþjófar takið eftir!

Veiðiþjófur sem dæmdur var 2007 fyrir að veiða urriða utan tímabils komst fyrir vikið á lista grunaðra hryðjuverkamanna í Norður-Karólínu í Bandaríkjunum. Þetta eru að margra mati heldur öfgafengin viðbrögð en sýnir að það er margt að varast ef maður getur ekki farið erftir reglunum. Hann fékk einnig 145$ sekt. Sjá: http://www.sfgate.com/news/article/North-Carolina-man-I-m-activist-not-terrorist-3839879.php#ixzz25kDqxJD4

Listinn er reyndar dálítið stór en alls eru um 400.000 nöfn á honum. Það má því segja að meira en einn af hverjum þúsund séu grunaðir hryðjuverkamenn. Það er því ljóst að fleiri en veiðiþjófar hafa komist á þann lista...

Norðurá II - Dagar 19 - 21

Þá lá leið í Norðurá II, eða fjallið. Norðurá II er frá Símastreng sem er rétt norðan við afleggjarann til Búðardals(ca 10 km norðan við Bifröst) og upp að Fornahvammi. Veiðikofinn, kallaður Skógarnef, er alveg ágætur, í fallegu rjóðri með útsýni yfir efri hluta Borgarfjarðar og m.a. Símastrenginn. Veiðikofinn er rétt norðan við bæinn Hvamm, eða næsta beygja til vinstri.

Svæðið er í sölu hjá SVFR og má finna veiðileyfi hér: http://svfr.is/veidileyfi/ og lýsingu á svæðinu hér:http://svfr.is/veidisvaedi/laxveidi/norduraiinordura/

Ekki myndi heitur pottur skaða en það er varla hægt að kvarta þar sem þetta er ákaflega notalegur staður. Norðurá II hentar þeim sem vilja veiða í Norðurá en vera út af fyrir sig, ákaflega vel. Það er nóg af laxi á fjallinu og nokkrir stórskemmtilegir veiðistaðir. Það verður samt að segjast að ég hef verið ákaflega óheppinn með veður undanfarna daga enda sól og blíða mestan hluta tímans. Frúin, sem var með í för í þetta skiptið var hins vegar ákaflega glöð og slétt saman þó fiskleysið væri að hrjá mig, enda með meiri sóldýrkendum sem ég hef kynnst.

Það mátti finna laxa á öllum helstu veiðistöðum, sérstaklega ber þó að nefna Klapparhyl, Króksfoss og króksstrengi og Símastreng. En þessir fiskar hreyfðu sig ekki sama hvað á gekk. Þeir hreinsuðu sig þó öðru hvort og einu sinni kom einn í SRS hjá mér. Að öðru leyti var ekkert að frétta. Það komu 3 laxar á þessar 3 stangir þessa þrjá daga. Þeir laxar komu allir að ég held á efstu veiðistöðunum og eitthvað í ómerktum hyljum.

það er svo magnað að þegar ég var að veiða Símastreng þá komst ég að því hversu fast þessir fiskar liggja og gat ég strokið einum þeirra um bakið án þess að hann færi, alveg ótrúlegt en satt. Ég tók nokkrar myndir á vídeócameruna og þá skipti engu máli þó ég væri að þvælast þetta í kringum fiskinn, honum var alveg slétt sama. En svona er þetta, stundum gengur allt upp og stundum er betra að leggja áherslu á grillið, sólina og góða skapið

Laxá í Dölum - Dagar 17 og 18

Vá hvað þetta er skemmtileg á! Laxá í Dölum minnir mig að ákveðnu leyti á Langá og svo skaðar ekki náttúran í kring. Það er verst að ég var þarna líklega í einhverri lélegustu veiði í manna minnum og allt á móti mér. Sól, vatnsleysi, lélegar göngur.... það vantaði bara nokkra seli í ósinn

Það var allt fullt af fiski í ánni en þeir voru ekki að taka hjá mér. Ég prófaði allt milli himins og jarðar sem löglegt er að festa við fluguveiðistöng en þessir hálfvitar hunsuðu allar mínar tilraunir. Ég hef í mörg ár horft til Laxár í Dölum enda á ég ansi oft leið um Búðardal og Laxárdalsheiði og því sorglegt að staðan skyldi vera svona loksins þegar mér gefst tækifæri til að veiða ána. 

En ég er viss um að það gefst annað tækifæri og þá verða bullandi göngur, skýjað og létt hafgola! Það er ekki nokkur spurning.Setti saman smá myndband að venju, takið eftir gárunum sem fara upp á móti í logninu á veiðistað 24, þarna voru nokkrir flottir að synda fram og til baka og svo í Þegjanda, þar synti hann næstum á lappirnar á mér.

Laxá í Dölum olli mér ekki vonbrigðum þó ég væri þarna á erfiðum tíma, hlakka til að heimsækja hana aftur.

Bjórþykkni - Snilldaruppgötvun

Já það er ekki oft sem maður verður orðlaus en það gerðist í skamma stund í dag þegar ég rakst á þessi snilldaruppfinningu sem kemur markað vestanhafs í byrjun næsta árs; bjórlíki. Sjá: http://patsbcb.com/beer/43-beer/85-beer.html

Bjór er 95% vatn og ef maður vill ekki standa í því að bera þungan bjór langar vegalengdir þá er þetta alger snilld! Kalt vatn úr ánni + bjórþykkni = Snilld.

Nú þarf bara einhvern til að flytja þetta inn :)

 

Viðtal - Gunnar Már Hauksson - Langá á Mýrum

Tók viðtal við veiðifélaga minn, hann Gunnar Má Hauksson sem kynnti mig fyrir Langá á sínum tíma. Gunnar Már hefur veitt Langá til fjölda ára og þekkir því bæði sögu hennar og leyndardóma.