Ísdorg í Levi-Lapplandi

Fyrsti dagurinn í ár varð að veruleika fyrir tilviljun, var á flakki í Lapplandi og tækifæri gafst til að prófa ísdorg við bæinn Levi. Það var rétt rúmlega 30 gráðu frost sem var reyndar ekki svo slæmt því fyrsta verkefnið var að ganga út á vatnið og svo bora niður um rúman metra og það hitar manni vel.

Setti saman stutt myndband um þá upplifun, í myndbandinu er Hermann Ottósson hjá Íslandsstofu einnig.

Nýtt útlit á veiðiblogginu - Pöddulíf

Jæja kæru vinir,
eftir miklar pælingar þá er loksins komin lending í stefnu veiðibloggsins árið 2011. Nýtt útlit, nýtt nafn og meiri veiði....jibbí!

Ég mun byrja á að vera með 5 hnýtingamyndbönd og er efni þeirra fyrst og fremst að fara yfir þær flugur sem komu vel út síðasta sumar, hvernig þær voru veiddar og ýmsar pælingar þar að lútandi. Einnig er kominn intró fyrir vídeóbloggið og það má skoða hér:

Síðan fer ég í ísdorg í lok febrúar og byrjun mars og það verður svaka spennandi. Ég geri einnig ráð fyrir að prófa strandveiðina og sjóstöngina í sumar ásamt því að leggja meiri áherslu á að kanna lítt þekktari leyndarmál íslenskrar silunga- og laxveiði. Það er því spennandi vertíð framundan og auðvitað er markmiðið 50 dagar, ekkert annað kemur til greina.

5 dagar eftir og ekkert planað!

Ný syrtir í álinn hjá þessum veiðimanni. 5 dagar eftir til að ná markmiði ársins og ekkert planað framundan. Þetta gengur auðvitað ekki og nú verður að gera eitthvað róttækt, spurning um að fara í einhver heiðavötn og reyna við ,,síðsumarbleikju", eða kannski gera tilraun til að komast í sjóbirting á suð-austurlandi?

Það er allavega ljóst að ekki gengur að láta örfáa daga skyggja á annars skemmtilegt veiðisumar. 45 dagar eru í pokanum og 5 dagar útaf til að ná markmiðinu. Taka skal fram að allar tillögur eru vel þegnar um þessar mundir og ekki myndi ég slá hendinni á móti boði um vikuveiði í Argentínu... :)

En ef einhver er farinn að sjá fram á að þetta takist ekki þá hættið að örvænta, það eru ennþá nokkrir dagar til áramóta og aldrei að vita hvað maður prófar!

Reykjadalsá S.-Þing, dagar 44 og 45

Enn einni veiðiferðinni lokið :) Að þessu sinni var Danni skipuleggjandi auk Ragga og Rúnars. Fjórir veiðibræður á ferð um norðurlandið. Það vildi svo til að ég var að vinna á VestNorden á Akureyri og var Glala kvöldið á fimmtudegi og ég því nokkuð ræfilslegur þegar strákarnir sóttu mig á föstudaginn.

Síðan var brunað austur að Laugum og voru höfuðstöðvar leiðangursins á Bollastöðum í þessu glæsilega veiðihúsi, með heitum potti og öllum græjum.

Við byrjuðum nokkuð seint á laugardeginum og það var komin bleikja á eftir ca 15 mínútur auk tveggja sem sluppu. Ég náði einhverju af bleikju og urriða en laxinn lét ekki sjá sig í ferðinni. Áin var aðeins skoluð en ekki svo mikið samt sem áður. Fiskurinn var frekar slappur og barðist ekki mikið en Danni og Rúnar settur í par af urriðum í gilinum og voru þeir fiskar nánast svartir og slápalegir, hef ekki séð þannig fiska áður. En fiskarnir neðar í dalnum voru í betra ástandi en ekki var mikið til að dreifa. Við fórum svo um að verða tvö á sunnudeginum þar sem ég þurfti að ná flugi til Reykjavíkur kl. þrjú og svo aftur á Ísafjörð kl. 5.

Frekar róleg ferð, ekki mikil veiði, kannski 8-9 fiskar í það heila, en alltaf gaman samt. Setti saman stutt myndband úr ferðinni. Og þar fyrir neðan er smá myndband af félagsskapnum, sorrý strákar, það er kominn tími á smá spaug hérna :)

Gauragangur í sveitinni :)

 

Víðidalsá - Hólmavík - Dagur 43

Það er nóg af veiði allstaðar ætti máltækið að segja, því þannig er það. Það er alveg sama hvar ég kem, árnar eru liggur við í kippum.

Ég stoppaði á Hólmavík á leið minni vestur (norður) á Ísafjörð um daginn og hitti þar Sigga í Galdrasetrinu. Hann benti mér á litla á sem heitir Víðidalsá og er alveg við Hólmavík, nokkra km sunnan við þorpið. Ég náði í Steina hjá Orkuveitunni sem sér um þessa á og við sættumst á framkvæmd mála og sýndi hann mér staðhætti og þess háttar mikilvæga hluti. Sagði reyndar að hann væri búinn að kenna fiskunum að bíta ekki á, og væri þeir góðir námsmenn því þeir hafi hætt að bíta á hjá honum líka

Setti saman stutt myndband frá Víðidalsá á Ströndum.

Náði einum fallegum hæng, 63sm.

Áin rennur úr virkjun sem þarna er og liggur í stokki fram að beygju en bugðast þá náttúrulega til sjávar. Þarna er fullt af laxi og svo er bleikja í lóninu fyrir ofan. Skemmtileg á.

Suðurfossá - Rauðasandi - Dagur 42

Hef verið að þvælast um Vestfirði undanfarið og það er margt fallegt og skemmtilegt. Nú lá leið mín yfir á Rauðasand og heimsótti ég fyrrum skólafélaga og núverandi bónda, hann Ástþór Skúlason á Melanesi. Ástþór er líka einn af eigendum Suðurfossár, sem er laxveiðiá og eftir samninga um verð var haldið til veiða. Ástþór sýndi mér líklega hyli og leyfði mér að taka við sig viðtal fyrir flugur.is sem er á þessum hlekk hér: http://www.flugur.is

Það gekk vel að veiða og fékk ég þrjá fallega laxa, 61, 67 og 69 sm. Ég var mjög ánægður með veiðina og ákvað að hætta um hádegisbilið, en tel þetta samt fullan veiðidag af því það var svo skemmtilegt :)

En mikið er fallegt á Rauðasandi, þetta er alveg magnaður staður og forréttindi að fá að egna fyrir laxi í svona umhverfi.

Sauðlauksdalur í Patreksfirði - Dagur 40 og 41

Skrapp í heimsókn á suðurfirðina um helgina og krassaði hjá pabba og mömmu. Auðvitað var það skylduheimsókn að kíkja í Sauðlauksdalinn og athuga hvernig bleikjubúskapurinn stendur.

 

Það verður nú að segjast að vegirnir eru all svakalegir á köflum, bæði á leiðinni að norðan og eins þegar komið er vestamegin í Patreksfjörð en ef rólega er farið sleppur þetta svosem :)

Í stuttu máli þá var bleikjan frekar róleg yfir helgina, fékk 7 tökur, missti 2 og sleppti 2.

Vatnadalsá/Staðará á Súganda - Dagur 39

Skrapp í gegnum Göngin til Súganda og fékk að veiða í Vatnadalsá/Staðará, hjá honum Kalla á Bæ. Áin er lítil og nett, vægast sagt. Þetta er hreinlega ein nettasta á sem ég hef reynt við lax í. En hún kom mér á óvart og viti menn, eftir hálftíma var kominn lax. Ég veiddi bara lítinn hluta árinnar enda tíminn knappur, það væri mjög gaman að fara efst og ganga niður með ánni og kasta í vænlega hyli með fjarkann að vopni, en það geri ég kannski seinna. Ég er mjög sáttur við gærkvöldið og hafi gaman af veiðinni enda er þetta svo allt öðruvísi laxveiði.

Áin liðast skemmtilega niður dalinn og sérstaklega er svæðið neðan við Bæ álitlegt en eins og ég sagði þá á ég eftir að skoða stóran hluta árinnar.

Flekkudalsá í Dölum - Dagar 36, 37 og 38

Fór í góðum félagsskap í Flekkudalsá í Dölum, nánar tiltekið í Fellasveit. Flekkurdalur og árnar Flekka og Tunguá eru afskaplega fallegar, margir mjög flottir veiðistaðir, það verður að segjast. Ég náði einum en missti 3 laxa, sama óheppnin að elta mig eins og verið hefur undanfarna túra. Ég setti til dæmis í gullfallegan lax í Fljótinu, hyl nr. 14 í Flekku í morgun en flugan losnaði af...Ég hreinlega skil það ekki því ég passa alltaf hnútana mjög vel, geri alltaf tvöfaldan og herði vel. En svona er þetta.

Veðurblíðan var rosaleg alla ferðina, nánast alveg logn og steikjandi hiti og sól, sem sagt hræðilegt laxaveiðiveður... :/ En ferðin var samt sem áður mjög skemmtileg og veiðifélagarnir hressir og skemmtilegir og maturinn alger snilld.

Ég setti saman smá myndband úr ferðinni.

 

Syðri-Brú, Dagur 35

Heimsótti einn uppáhalds veiðistaðinn minn, Syðri-Brú í Soginu. Þetta er í raun bara einn veiðistaður, Klöppin sem liggur austan megin við útfallið af Ljósafossvirkjun. Beint á móti er hluti af Bíldsfelli, þeim fræga bleikjuveiðistað en þar fæst einnig mikið af laxi á hverju ári.

Ég hef einhverra hluta vegna aldrei veitt lax á fyrri vaktinni þarna og þannig var það líka í gær en ég missti fimm fiska, reyndar var það að hluta til klaufaskapur í mér, fyrst var ég með fjarkann og tökuvara að reyna við bleikju sem ég hafði séð koma upp öðru hvoru og síðan var ég með fimm punda taum til að athuga hvort það gengi betur, þ.e. hvort sverari taumur styggi laxinn. Ég fékk reyndar töku í fyrsta kasti með þeim taum...en það getur auðvitað verið tilviljun. En sá lax slapp í löndun, það slitnaði úr flugunni þegar hann var kominn hálfur upp á land. Það var ansi svekkjandi.

Það hefði nú kannski borgað sig að taka hann í háfinn þennan :)

Síðan kom auðvitað laxinn sem hélst á og Bubbi tók hann fagmannlega í silungaháfinn og skóflaði honum á land, en það sést á youtube myndbandinu hér fyrir neðan :)

Spurning um að fá sér stærri háf?

Það er alltaf fiskur í Syðri-Brú en það er erfitt að ná honum. En ég hef ekki farið fisklaus heim enn...sjö, níu, þrettán :)