Fluguveiðiráð

Bókin Fluguveiðiráð eftir Stefán Jón Hafstein er glimrandi innsýn í fluguveiði. Hún virkar á mig sem heildrænn inngangur í þetta skemmtilega áhugamál. Í verkinu er farið yfir veiðitaktík við helstu aðstæður- og fersksvatnsfiska á Íslandi, ásamt ráðleggingum um fluguval, taumalengd og ýmislegt fleira. Lesturinn er léttur og þægilegur og fyrirsagnir skemmtilegar og vekja forvitni.

Ljósmyndirnar eftir Lárus Karl Ingason eru stór hluti af bókinni og ljóst að hann kann sitt fag, en ég saknaði myndatexta eða myndayfirlits t.d. með heiti veiðisvæða. 

Ég myndi hiklaust mæla með þessari bók, sérstaklega fyrir þá sem eru að byrja í þessu sporti. Bókin væri skynsamlegur hluti af fyrsta fluguveiðisettinu. Heima hjá mér er einnig mikið af börnum og unglingum og hafa allir aldurshópar sýnt verkinu áhuga þannig að það er ljóst í mínum huga að hún virkar á breiðan hóp.

Hér má nálgast bókina á vef Eymundsson!

Hér má sjá Youtube kynningu á bókinni:

Athugasemdir

[Jóhann Elíasson, 4.1.2014 kl. 13:27]

Þessi bók er algjört snilldarverk og nokkuð sem vantaði á markaðinn fyrir löngu  síðan.  Því miður hafa menn verið að þróa með sér tækni og þekkingu í gegnum árin en hafa ekki viljað miðla neinu til annarra þannig að menn sem eru að byrja í faginu verða oft á tíðum að "prófa" sig áfram og læra hlutina á eins erfiðan máta og hægt er og sumir bara gefast upp og hætta í sportinu............